健康飲食反而增加肺癌風險？南加大顛覆性研究：兇手可能藏在你的蔬果裡！

健康飲食居然可能增加年輕非吸煙者的肺癌風險？這項研究提醒大家「健康」背後潛藏危機。

每天食蔬果，幾乎是每個注重健康人士嘅必然選擇。然而，最新公佈嘅兩份權威報告，卻令人開始重新審視「健康飲食」嘅真正意義——蔬果上殘留嘅農藥，可能正在不知不覺間威脅我哋嘅健康。

健康飲食指數愈高，肺癌風險愈高？

在美國舉行的2026年美國癌症研究協會（AACR）年會上，南加州大學諾里斯癌症綜合研究中心團隊發表了一項令人震驚的研究成果——50歲以下嘅年輕非吸煙者中，飲食愈「健康」嘅人，患上肺癌嘅風險反而愈高。

研究團隊分析了187名50歲前確診肺癌嘅患者，當中大部分從未吸過煙，而且女性佔咗78%。研究人員採用「健康飲食指數」（HEI）評估呢班患者嘅飲食質量，結果發現佢哋嘅平均得分為65分，顯著高於全美平均嘅57分。

更值得關注嘅係，呢班患者每日食用4.3份深綠色蔬菜同豆類，以及3.9份全穀物，而普通美國成年人嘅平均攝取量分別只係3.6份同2.6份。

研究負責人、USC諾里斯癌症中心腫瘤科醫生Jorge Nieva直言：「我們的研究表明，相較於普通人群，飲食中健康食物攝入量較高的年輕非吸煙者，患肺癌的可能性更大。 這違反常理的發現，強調了關於肺癌的未知環境風險因素問題。」

為甚麼會出現這情況？「兇手」可能藏在蔬果表面

咁，問題出喺邊？科學家認為，關鍵不在於蔬果本身，而係佢哋表面殘留嘅農藥。

Nieva指出，商業生產嘅非有機水果、蔬菜同全穀物，其農藥殘留水平比乳製品、肉類同許多加工食品更高。而過去已有研究發現，經常接觸農藥嘅農業從業員，患肺癌嘅比率往往更高，呢個發現為兩者之間嘅關聯提供了有力嘅佐證。

換句話說，我哋每天食入嘅「健康食物」，可能同時將殘留喺表面嘅農藥一併食咗落肚。對於每日攝取大量蔬果嘅人士，農藥累積嘅風險自然更高。

EWG 2026「最骯髒蔬果」名單出爐

幾乎同一時間，美國環境工作組織（EWG）發佈了備受關注嘅《2026年農產品農藥購物指南》。該報告分析咗美國農業部對47種蔬果、合共54,344個樣本嘅檢測數據，所有樣本喺檢測前均經過去皮、擦洗及清洗等處理，以模擬消費者喺家中嘅處理方式。

結果令人震驚：即使經過清洗，仍驗出264種農藥，高達75% 嘅非有機蔬果樣本被驗出含有農藥殘留。EWG將殘留農藥含量最高、毒性最強嘅12款蔬果列為「Dirty Dozen」（最骯髒12款），當中96% 樣本被驗出農藥殘留，共檢測出203種農藥。

2026年EWG「最骯髒12款」蔬果名單如下：

菠菜（連續兩年蟬聯榜首，農藥殘留重量居所有農產之冠）
羽衣甘藍、芥藍和芥菜
士多啤梨
提子
油桃
桃子
車厘子
蘋果
黑莓
梨
馬鈴薯
藍莓

除咗馬鈴薯之外，其餘11款蔬果平均每個樣本均被驗出4種或以上嘅農藥殘留。睇吓自己嘅雪櫃同餐桌，以上呢啲「高危」蔬果，你同屋企人係咪幾乎日日都食？

2026年新焦點：PFAS「永久化學物質」廣泛污染

今年EWG報告嘅另一個重大焦點，係首次點名PFAS（全氟／多氟烷基物質）類農藥嘅問題。喺「最骯髒12款」蔬果中，約63% 嘅樣本檢出PFAS農藥殘留，其中桃子與李子嘅檢出率更高達近9成。

PFAS被稱為「永久化學物質」，因為佢哋化學結構極其穩定，喺環境中難以自然分解，可能需要數十年甚至更長時間先會降解。林口長庚醫院臨床毒物中心顏宗海主任指出，PFAS經由飲用水或食物鏈進入人體後，可能分布在血液、肝臟與腎臟，還可能穿透胎盤導致胎兒暴露。流行病學研究更指出，PFAS嘅長期暴露與血脂濃度、肝功能異常、腎臟癌與睪丸癌嘅風險上升有關。

清洗誤區與正確方法

面對呢啲令人擔憂嘅數據，最直接嘅應對方法就係正確清洗蔬果。

台灣林口長庚醫院臨床毒物科護理師、無毒生活達人譚敦慈特別提醒，以下三種清洗方法反而可能弄巧反拙，將農藥食落肚：

❌ 長時間浸泡：農藥溶解喺水後，反而會透過滲透作用「跑返入去」蔬果內部，令農藥殘留更難去除。
❌ 用鹽水浸泡：鹽水不但無助去除農藥，反而可能破壞蔬果細胞壁，令農藥有機可乘、滲入蔬果內部。
❌ 使用蔬果清潔劑：萬一清潔劑本身沖洗唔乾淨，殘留物同樣會食落肚，帶來另一重化學污染風險。

譚敦慈教路，正確清洗有三大步驟：

✅ 第一步：先浸泡——買返嚟嘅蔬果先唔好去掉蒂頭或切段，直接浸泡喺清水中約5分鐘，讓水溶性農藥溶解出嚟。
✅ 第二步：後沖洗——用流動嘅細小清水沖洗，葉菜類要撥開葉面沖洗根部，凹凸不平嘅蔬果則利用水流沖刷帶走縫隙中嘅髒污。
✅ 第三步：不蓋鍋蓋——烹煮時鍋蓋打開，有助揮發性農藥隨蒸氣消散。